முனைவர் க.சுபாஷிணி
தமிழ்நாட்டிற்கு வெளியே இதழியல் முயற்சிகளைத் தொடங்கிய தமிழ் மக்கள் பல்வேறு சவால்களுக்கிடையே இதழியல் பணிகளைச் சாதித்திருக்கின்றார்கள். அத்தகைய ஒரு முயற்சியாக கடந்த நூற்றாண்டில் மலாயாவில் தமிழ் இதழியல் முயற்சிகளை மேற்கொண்டவர்கள் பதிந்துவைத்த செய்திகள் நமக்கு இன்று 20ஆம் நூற்றாண்டின் தொடக்ககால செய்தியை அறிந்து கொள்வதற்குத் தரவாக அமைகின்றன.
அன்றைய மலாயாவின் சிங்கை பகுதியில் இருந்து வெளிவந்த பத்திரிக்கை ”முன்னேற்றம்”. இது 1920 களின் இறுதி காலகட்டங்களில் வெளிவந்து 1930 களிலும் தொடர்ந்தது.
17.1.1929 ஆம் ஆண்டு தேதியிடப்பட்ட ”முன்னேற்றம்” வார இதழில் ஒரு பக்கத்தில் வழங்கப்பட்டிருக்கும் செய்தி நமக்கு ஒரு தகவலை வழங்குகிறது.
அதாவது, சமகாலத்தில் அன்று தமிழ்நாட்டில் இருந்து வெளிவந்த அல்லது வெளிவந்து கொண்டிருந்த வாரப் பத்திரிகைகள், தினசரி பத்திரிகைகள் பற்றிய செய்தி இது.
சிங்கையில் இருந்து வெளியிடப்பட்ட முன்னேற்றம் பத்திரிக்கை அக்காலகட்டத்தில் சமகால இதழியல் முயற்சிகள் பற்றி குறிப்பிடுகிறது. அதில் உள்ள ஒரு பக்கத்தில் அமைந்திருக்கின்ற நான்கு பத்திரிக்கைகள் தொடர்பான விளம்பரங்களை இச்செய்தி நமக்கு வெளிப்படுத்துகிறது.
”குடியரசு” - இதன் ஆசிரியர் ஈ.வே.ராமசாமி. இவ்வாரப் பத்திரிக்கை ”அஞ்ஞானம் போக்கி மெய்ஞ்ஞானம் அளிக்கும் ஆத்ம ஞான சுடரொளி” என்ற விளம்பரத்தோடு வெளியிடப்பட்டிருக்கிறது. தமிழ்நாட்டில் மட்டுமல்லாமல் அன்றைய மலாயாவில் இதனைப் பெற விரும்புவோர் வருட சந்தாவாக அன்றைய ரூபாய் 4 செலுத்தி இதனைப் பெற முடியும். குடியரசு வாரப் பத்திரிக்கையின் அலுவலகம் ஈரோட்டில் இயங்கியது என்பதைப் பற்றிய செய்தியையும் காண்கிறோம்.
அடுத்ததாக, ”திராவிடன்” என்ற பெயர் கொண்ட தினசரி பத்திரிக்கை. இதன் ஆசிரியர் சகன சங்கர கண்ணப்பர். ”பார்ப்பனர் அல்லாதாரின் முன்னேற்றத்திற்கு உழைக்கும் ஒப்பற்ற தமிழ் தினசரி பத்திரிகை இது” என்ற குறிப்போடு உள்ளது. மாத சந்தா மலாயாவில் ரூபாய் 1-8-0 என்றும் வருட சந்தா ரூபாய் 18-0-0 என்றும், இப்பத்திரிகை அலுவலகம் சென்னை மவுண்ட் சாலையில் இருந்தது என்பதையும் இச்செய்தி குறிப்பிடுகிறது.
அடுத்ததாக, ”குமரன்” என்ற பெயர் கொண்ட ஒரு பத்திரிக்கை. இதன் ஆசிரியர் சொ.முருகப்ப செட்டியார். இப்பத்திரிகையின் அலுவலகம் காரைக்குடியில் இயங்கியது என்றும் இப்பத்திரிக்கை ”தீந்தமிழின் தெளிந்த கட்டுரைகள் நிறைந்து திகழும் சிறந்த வார பத்திரிகை” என்ற குறிப்போடு வருகிறது. மலாயாவிற்கு வருட சந்தா ரூபாய் 6 என்றும் குறிப்பிடப்பட்டுள்ளது.
இறுதியாக நாம் காண்பது ”நாடார் குலமித்திரன்”. இதன் ஆசிரியர் சூ. ஆ. முத்து நாடார். இதன் அலுவலகம் அருப்புக்கோட்டையில் இருந்து செயல்பட்டதாகவும் "நாட்டு நலனுக்கும் நாடார் சமூகத்தினரின் நன்மைக்கும் நீதி நெறிக்கும் நிலைநின்று உழைக்கும் தமிழ் வாரப் பத்திரிக்கை" என்ற செய்தியும் இதில் வழங்கப்பட்டுள்ளது.
ஆக, சிங்கையிலிருந்து வெளிவந்த முன்னேற்றம் என்று பெயர் கொண்ட இந்த வாரப்பத்திரிக்கை தமிழ்நாட்டில் இருந்து தமிழ் மக்களின், அதிலும் குறிப்பாகச் சமூக மாற்றத்தையும் எழுச்சியும் ஏற்படுத்த வேண்டும் என்று முனைப்போடு செயல்பட்ட சமகால நான்கு பத்திரிகைகள் பற்றிய செய்தியை நமக்கு வழங்குகின்றது.
அதுமட்டுமல்லாது மலாயாவிற்கு வந்து வாழ்கின்ற தமிழ்மக்கள் தமிழ்நாட்டில் நடக்கின்ற நிகழ்வுகளைப் பற்றி அறிந்து கொள்வதற்கும், அதன்வழி தங்களது வாழ்க்கை நிலையை முன்னேற்றிக் கொள்ளவும், அரசியல் ரீதியாக தங்களது தேவைகளை அறிந்து அடிமைத்தனத்திலிருந்து மீளும் சிந்தனையைப் பெறுவதற்கும் இந்த இதழியல் முயற்சிகள் பெரும் பங்காற்றியுள்ளன என்பதையும் காண்கின்றோம்.
[குறிப்பு: இப்பத்திரிக்கைச் செய்தி இக்கட்டுரை ஆசிரியரால் பிரித்தானிய நூலகத்தின் ”இந்தியா அலுவலகம்” பகுதியில் உள்ள ஆவணப்பாதுகாப்புப் பகுதியிலிருந்து 17.9.2025 அன்று மின்னாக்கம் செய்யப்பட்டது]
(இக்கட்டுரை தமிழ் வளர்ச்சித் துறையின் உலகத் தமிழ் இதழ் 308ல் இன்று வெளியிடப்பட்டது)
